MCHUNGAJI MWASUMBI AACHILIWA HURU BAADA YA HUKUMU YA MIAKA 30 JELA KWA TUHUMA ZA UBAKAJI, MAGEREZA WALIA KUMKOSA MHUBIRI WAO

Mchungaji Mwasumbi akiwa mahakamani mwaka jana. ©Global Publishers

Hatimaye Mchungaji Daniel Mwasumbi ambaye mwaka jana alihukumiwa na Mahakama ya Wilaya ya Mbeya kifungo cha miaka thelathini (30) jela Julai mwaka 2013 kwa tuhuma za ubakaji hapo jana tarehe 3 Juni ameachiwa huru na Mahakama kuu kanda ya Mbeya  huku akiwa anatetewa na wakili wa kujitegemea Benjamini Mwakagamba mbele ya jaji Atuganile Ngwala, huku upande wa serikali ukiwakilishwa na Prosista Paul.

Kwa mujibu wa WAPO Radio FM 98.1 kupitia kipindi cha Yaliyotokea kinachorushwa saa moja usiku, ripota kutoka mkoani Mbeya bwana Ezekiel Kamanga ambaye alifika mahakamani hapo, anasema kwa upande wa utetezi wakili Benjamini Mwakagamba aliwasilisha sababu saba ambazo zilikuwa zikiomba mahakama hiyo kumwachia huru kutokana na hakimu kukosea kuzingatia moja ya mashahidi ambaye alikuwa ni shahidi wa kwanza.

Ameongeza kuwa pili ni kuwa hakimu alikuwa ameegemea ushahidi wa upande mmoja tu hivyo mahakama haikuwa na haki ya kumfunga kifungo hicho cha miaka thelathini . La tatu ni kuwa hakimu alitumia maoni yake binafsi kumfunga mshtakiwa hali ambayo ni kinyume cha sheria. Sababu ya nne ambayo ilitolewa na upande wa utetezi ni kutumika kwa kivuli cha kadi ya kliniki hali ambayo haikuwa ni halali kuweza kuwakilisha kama upande wa ushahidi.

Lakini  sababu nyingine ni kuhusu kuchelewa kwa vipimo vya DNA kutumwa jijini Dar es Salaam huku pia sababu nyingine ikielezwakuwa kubwa ni kukosewa au kutozingatia muda wa kesi hiyo mara baada ya kufikishwa polisi kutumia mda mrefu tangu kukamatwa, kwani ilichukua takribani miezi minne ndipo alipokamatwa mtuhumiwa hali ambayo mahakama ilitilia shaka na hivyo kwa upande wake jaji Atuganile Ngwala kuamua kumwachia huru kutokana na sababu hiyo ni kwamba hivi sasa mchungaji Daniel Mwasumbi atakuwa huru  ambapo kesi hiyo ya rufaa namba 59  ya mwaka 2013 ikimalizikia hapo, ali iliyopelekea watoto wa Mchungaji Daniel Mwasumbi kuangua kilio cha furaha mahakamani.

Taarifa zinasema kwa upande mwingine magereza wanasikitika kuachana na Mchungaji Mwasumbi kwa hali aliyokuwa ameionyesha kwa siku za hivi karibuni, kwani hata WAPO Radio ilipomtembelea, alionekana mwenye kukubaliana na hali aliyoko, huku pia akikubalika sana gerezani hapo kwa kuhubiri injili, ambapo pia alikuwa kiongozi wa ibada gerezani huku wengine wakiachiwa huru kwa maombi aliyokuwa akiwafanyia na wengine wakimpokea Yesu.

Mara baada ya kuachiwa huru Mchungaji Daniel Mwasumbi hakuweza kuzungumza lolote kwani alichukuliwa na gari la magereza ili kwenda kukamilisha taratibu za kuachiwa huru lakini kwa upande wa watoto wake ilikuwa ni furaha na kumshukuru Mungu kwa kile kilichotokea huku wakidai kuwa alifungwa kwa hila na njama za baadhi ya watu ambao walikuwa wakipinga huduma yake ambayo alikuwa anaifanya katika kanisa la EAGT eneo la Iwambi.